XƏBƏRLƏR
- 23/11/2018 5-ci "Seni Cup" turniri keçirilmişdir.
Azərbaycan Respublikası Milli Paralimpiya Komitəsi, Azərbaycan Boccia Federasiyasının təşkilatçılığı və “Seni” firmasının dəstəyi ilə boccia idman növü üzrə 5-ci "Seni Cup" turniri keçirilmişdir.
Gazette-nin məlumatına görə, 22 noyabr 2018-ci il tarixində Abşeron Olimpiya İdman kompleksində keçirilmiş turnirin final mərhələsində respublikanın müxtəlif regionlarından 60-dan çox idmançı iştirak etmişdir.
Tədbirdə Azərbaycan Respublikası Milli Paralimpiya Komitəsinin prezidenti İlqar Rəhimov və Mərkəzi Asia və Qafqaz üzrə “Seni” şirkətinin koordinatoru Mixail Kopaç yarış iştirakçılarını salamlayaraq, onlara uğurlar arzulamışdır. Həmçinin Gənclər və İdman nazirliyinin şöbə müdiri, olimpiya çempionu Fərid Mansurov, iki qat paralimpiya çempionu İlham Zəkiyev, “Həyat” fondun prezidenti Haci Nuran və Abşeron rayonu İcra hakimiyyətinin rəhbərliyi də tədbirdə iştirak etmişlər.
Sonda final yarışları keçirilmiş və qaliblərə Milli Paralimpiya Komitəsinin diplomları, medal və kuboklar təqdim edilmişdir.
Yarışda Ukraynanın boccia idman növü üzrə idman ustası Artyom Kolinko da idmançılara dəstək olaraq yarışlara qoşulmuşdur.
Qaliblərin mükafalandırılmasından sonra amputant futbolu idman növü üzrə Abşeron rayonu və Sumqayıt şəhərinin komandaları arasında yoldaşlıq görüşü keçirilmiş və Milli Paralimpiya Komitəsinin prezidenti qalib komandaya kubok təqdim etmişdir.
Qeyd edək ki, boccia fiziki imkanları məhdud idmançıların məşğul olduğu Paralimpiya idman növüdür. Bu idman növünün təbliğ olunması məqsədi ilə 2013-cü ildən etibarən hər il boccia idman növü üzrə “Seni Cup” turniri təşkil olunur.
Boccia idman növü Milli Paralimpiya Komitəsi tərəfindən 5 ildir ki, ölkəmizdə təbliğ olunur və bu istiqamətdə bir sıra tədbirlər həyata keçirilir. Hazırda 5 kateqoriya üzrə 17 regiondan 100 dən çox fiziki məhdudiyyətli şəxs boccia ilə məşğul olur və bu idman növü ilə məşğul olmaq istəyənlərin sayı getdikcə artmaqdadır.
Bunu nəzərə alaraq, Heydər Əliyev fondunun vitse-prezidenti Leyla Əliyevanın təşəbbüsü ilə cari ilin mart ayında Azərbaycan Boccia Federasiyası yaradılmışdır, Vüqar Əsgərov Federasiyanın vitse prezidenti, İlham Məhərrəmov Baş katibi seçilmişdir.
Bu xəbər 2145 dəfə oxunub
1.jpg)
