Əlilliyin qarşısının alınması və əlillərin reabilitasiyası üzrə 1999-2002-ci illər üçün Dövlət Proqramının təsdiq edilməsi haqqında
AZƏRBAYCAN RESPUBLİKASI PREZİDENTİNİN SƏRƏNCAMI

Azərbaycan Respublikasında bazar iqtisadiyyatı şəraitində həyata keçirilən islahatlarla yanaşı dövlət qayğısına daha çox ehtiyacı olan əlillərə tibbi yardım göstərilməsi, onların sosial müdafiəsinin gücləndirilməsi dövlət siyasətinin mühüm istiqamətlərindən birini təşkil edir.
Azərbaycan Respublikasında əlilliyin dinamikasına bir sıra amillər öz təsirini göstərmişdir. Ermənistanın Azərbaycana qarşı silahlı təcavüzü nəticəsində minlərlə soydaşımız işgəncələrlə qarşılaşmış və əlil olmuşlar.
Bundan əlavə müəyyən xəstəliklər, istehsalatda baş verən bədbəxt hadisələr və sair amillər də əlilliyin vəziyyətinə təsir etmişdir.
Son illərdə əlillərin sosial vəziyyətinin yaxşılaşdırılması istiqamətində ardıcıl və məqsədyönlü iş aparılaraq onların tibbi, sosial və peşə reabilitasiyası, məşğulluğunun təmin olunması, mənzil-məişət problemlərinin həlli üçün bir sıra tədbirlər həyata keçirilmişdir.
Əlillərin reabilitasiyasını, onların cəmiyyətə inteqrasiyasını və digər tədbirlərin kompleks şəkildə yerinə yetirilməsini təmin etmək məqsədi ilə Əlilliyin qarşısının alınması və əlillərin reabilitasiyası üzrə 1999-2002-ci illər üçün Dövlət Proqramı hazırlanmışdır.
Proqramda əlillərin tibbi, sosial, məişət və digər problemlərinin həlli sahəsində əməli tədbirlərin həyata keçirilməsi məqsədilə onların reabilitasiyasının elmi-metodiki və hüquqi təminatı, tibbi-sosial ekspertiza xidmətinin müasir tələblərə uyğun təşkili və onun normativ-hüquqi bazasının təkmilləşdirilməsi, ixtisaslı tibbi xidmət sistemi ilə təmin olunması, əlilliyin profilaktikası, əlillərə münasib əmək və mənzil-məişət şəraitinin yaradılması, yeni iş yerlərinin açılması üçün təşkilati tədbirlərin görülməsi nəzərdə tutulur.
Göstərilənlərə əsasən və "Əlilliyin qarşısının alınması, əlillərin reabilitasiyası və sosial müdafiəsi haqqında" Azərbaycan Respublikası Qanunundan irəli gələn məsələlərin həlli məqsədi ilə qərara alıram:
1. "Əlilliyin qarşısının alınması və əlillərin reabilitasiyası üzrə 1999-2002-ci illər üçün Dövlət Proqramı" təsdiq edilsin (əlavə olunur).
2. Azərbaycan Respublikasının Nazirlər Kabineti bu Sərəncamdan irəli gələn məsələləri həll etsin.
3. Bu Sərəncam imzalandığı gündən qüvvəyə minir.

Azərbaycan Respublikasının Prezidenti HEYDƏR ƏLİYEV
Bakı şəhəri, 14 may 1999-cu il
№ 155